बुलढाणा प्रतिनिधी:
बुलडाणा: महसूल विभागातील अभ्यासू, परिश्रमी अधिकारी म्हणून ओळख असलेले व समृद्धी महामार्गाच्या प्राथमिक टप्प्यातील कामामुळे राज्यात लौकिक मिळवणारे प्रशासक दिनेश गीते यांनी आज, 6 ऑक्टोबरला जिल्हाधिकारी कार्यालयातील निवासी उप जिल्हाधिकारी (आरडीसी) पदाची सूत्रे स्वीकारली.
त्यांच्या रूपाने जिल्ह्याला दीर्घकाळानंतर जिल्हावासीच अर्थात भूमिपूत्र असलेला अधिकारी मिळाला आहे. यापूर्वी आरडीसी रामेश्वर पुरी यांची बाळापूर (जिल्हा अकोला) उप विभागीय अधिकारी म्हणून बदली झाली. त्यांच्या रिक्त जागी कोणाची नियुक्ती होते याकडे प्रसाशकीय वर्तुळाचे लक्ष वेधले होते. अखेर या जागी उप जिल्हाधिकारी दिनेश गीते यांची नियुक्ती झाली. त्यांच्या नियुक्तीचे आदेश सोमवारी (दि. 5) रात्री येथे प्राप्त झाले. दरम्यान गीते यांनी आज 6 ऑक्टोबर रोजी दुपारी मावळते आरडीसी डॉ. पुरी यांच्याकडून पदाची औपचारिक सूत्रे स्वीकारली, आपण लोकाभिमुख व पारदर्शक प्रसाशनाला प्राधान्य देणार असल्याचे त्यांनी सांगितले. जिल्हाधिकारी यांच्या मार्गदर्शनात विविध विकास कामे मार्गी लावण्याचा आपला प्रयत्न राहणार असल्याचे त्यांनी सांगितले. कोरोनाच्या प्रार्श्वभूमीवर त्यांनी अत्यंत साधेपणाने पदाची सूत्रे स्वीकारली. कोणाकडूनही पुष्पगुच्छ वगैरे न स्वीकारता त्यांनी केवळ शुभेच्छाच स्वीकारल्या, पदभार स्वीकारल्यावर त्यांना विविध अधिकारी व कर्मचारी यांनी कामकाजबद्धल शुभेच्छा दिल्या. महसूल कर्मचारी संघटनेतर्फे त्यांचे स्वागत आले.
