आम आदमी पक्षाच्या वतीने सिल्लोडचे तहसीलदार श्री. विक्रम राजपूत यांच्या मार्फत प्रशासनाला निवेदनाद्वारे मागणी करून त्रीव आंदोलन छेडण्याचा इशारा
सिल्लोड (प्रतिनिधी) :- शेतकऱ्यांनी सालाबाद प्रमाणे शेतीमध्ये पेरणीपूर्व मशागत करून खते बी-बियाणे औषधे आदी सर्व हजारो रुपयांचा खर्च सोसुन पेरणी केली, पिकांची वेळोवेळी कास्तं केली. एवढेच नाही तर शेतातील पिकांना पोटच्या लेकराप्रमाणे जपले. परंतु परतीच्या पावसाने प्रचंड प्रमाणावर अतिवृष्टी होऊन शेतकऱ्यांच्या हाता-तोंडाशी आलेला घास हा हिरावुन जाऊन शेतकऱ्यांचे मूग, उडीद, सोयाबीन, कापूस, मका आदी शेती पिकांचे प्रचंड प्रमाणावर नुकसान शेतकऱ्यांचे आर्थिक कंबरडे मोडले आहे. काही हताश शेतकऱ्यांनी आत्महत्या केल्याचे देखील उदाहरणे असून त्यांचे कुटुंब उघड्यावर पडले आहे. शासनाकडून शेतकऱ्यांच्या शेतीपिकांचे नुकसानीचा पंचनामा केल्याचा गाजावाजा केला जात आहे, परंतु संबंधित विमा कंपन्या आणि इतर दबावतून संबंधित महसूल अधिकारी व कृषी विभागाचे संबंधित अधिकारी हे शेतकऱ्यांच्या शेतीपिकांचे नुकसानीचे पंचनामे करण्यास जाणीवपूर्वक दुर्लक्ष करीत आहे. त्यातच विमा कंपण्यांनी आणेवारी व इतर पळवाटांचा गैरफायदा घेऊन कट करून शेतकर्‍यांची घोर फसवणूक विश्वासघात केला जात आहे.
शेतकऱ्यांच्या शेतातील पिकांचे नुकसान हे वास्तव असून परतीच्या पावसाने प्रचंड अतिवृष्टी होऊन शेतकऱ्यांचे अतोनात नुकसान झाल्याने ओला दुष्काळ जाहीर करण्यात यावा. त्याचप्रमाणे शेतकऱ्यांमध्ये विमाधारक व बिगर विमाधारक असा भेदभाव न करता, पंचनामे व अटी शर्ती याचा खेळ न खेळता शेतकऱ्यांना सरसकट हेक्टरी 50 हजार रुपये नुकसान भरपाई द्यावी. ज्या शेतकऱ्यांची नावे 7/12 उता-यात तांत्रिक कारणाने नाही, त्यांची स्वतंत्र यादी संकलित करून त्यांना देखील सरसकट नुकसान भरपाई द्यावी. शेतकऱ्यांना शेती पिकाचे नुकसानीची भरपाई देण्यास टाळाटाळ करणाऱ्या विमा कंपन्यांवर गुन्हे दाखल करावे, अन्यथा शेतकऱ्यांच्या न्याय हक्काच्या मागण्यांसाठी आम आदमी पक्षाच्या वतीने त्रीवर स्वरूपाचे आंदोलन करण्याचा इशारा निवेदनाद्वारे तहसीलदार, सिल्लोड श्री. विक्रम राजपूत यांचेमार्फत प्रशासनाला दिला असून निवेदनावर जिल्हा सहसंयोजक ॲड. शेख उस्मान शेख ताहेर, जिल्हा संघटनमंत्री अजबराव मानकर, सिल्लोड - सोयगांव विधानसभा संयोजक महेशकुमार शंकरपेल्ली, तालुका संयोजक डॉ. दत्तात्रय गोंगे, शहर संयोजक शेख रफीक अब्दुल रहीम, संघटनमंत्री इस्माईल शेख सलीम शेख, तालुका सहसंयोजक नजीर तडवी, आप पालक अघाडीचे असलम खान पठाण, शहर सचिव इम्रान देशमुख, अल्पसंख्यांक तालुकाध्यक्ष मुस्ताक खा मेवाती, दौड फकीरा शेनफड, सुनील पाटील गुळवे, मुक्तार शहा मुसा शहा आदी पदाधिका-यांच्या स्वाक्षर्‍या आहेत.
